كيفية التعامل مع اول يوم مدرسة

نهى الزينى
كثير من الآباء والأمهات بيواجهوا مشاكل كثيرة أول ما يودوا ولادهم الحضانة “الروضة” وتلاقوا الولد أو البنت يدخلوا الحضانة من هنا وهاتك يا عياط ويا صريخ وكأنهم باعوه في سوق العبيد
وده بيحصل لأنهم مهيأوش ولادهم للحضانة.

علشان كده تعالوا نعرف مع بعض ازاي نهيأ ولادنا لدخول الحضانة:
⃣1 احكوا لولادكم قصص عن المدرسة والحضانة جميلة وظريفة بلاش موضوع انكم كنتم فشلة وبتتضربوا ولا تتمدوا ولا الكلام ده خاللوها في سركم

2⃣عودوا ولادكم انهم يقدروا يبعدوا عنكم يعني مثلا يباتوا عند تيته يومين، عند خالتو يوم، علشان يتعودوا على البعد عنكم واهو ترتاحوا من دوشتهم شوية

3⃣العبي في البيت مع ولادك ومثلي دور المدرسة وهم تلامذة عندك وكمان تعوديهم يستئذنوا منك علشان يدخلوا الحمام مثلا، علشان يتعودوا لأن كثير من الأولاد بيكونوا في الحضانة وخصوصا في الأول بيكونوا مش عارفين يعبروا عن احتياجاتهم وممكن يعملوا على نفسهم، بس بلاش تعملوا فيها أبلة إنشراح وتفتروا على الولاد وتعقدوهم قبل ما يروحوا الحضانة أصلا

4⃣عودوا ولادكم على انكم تاخدوهم معاكم أماكن غريبة وجديدة كثير، وكمان يتكلموا مع أغراب يعني مثلا أصحابكم وصاحباتكم يكلموهم يدخلوا ماركت يشتروا هم ويكلموا البياع

5⃣عودوا ولادكم على النوم بدري علشان يصحوا فايقين الصبح بدري ومتتعذبوش وانتم بتصحوهم وناموا بدري انتم كمان علشان متصحوش تصحوهم وتناموا جنبهم

6⃣ خدوا ولادكم معاكم يختاروا شنطة الحضانة والأقلام اللي هيكتبوا بيها واللانش بوكس بتاعهم علشان يكونوا فرحانين باختيارهم وكمان اشتروهم قبل الحضانة بإسبوعين مثلا وقولوا لهم مش هتستعملوها غير لما تروحوا الحضانة علشان يكونوا مشتاقين وحابين يروحوا الحضانة علشان يستعملوها

7⃣مهم جدا تختاروا حضانة كويسة لولادكم سمعتها حلوة ومعاملتها حلوة مع الأطفال بلاش الحضانات اللي مدرسينها بيصرخوا ويصوتوا في الولاد ولا اللي الدادة بتاعتها بتاكل ساندويتشات الأطفال

8⃣مهم تودعوا ولادكم بحضن وتستقبلوه بحضن ومكافئة وخصوصا في الأول وكمان المس تديله حاجة حلوة أول ما يروح علشان يحب الحضانة

9⃣مهم كمان في أول كام يوم الوقت اللي الطفل يقعده في الحضانة يكون قليل يعني ساعتين مثلا ويبدأ يزيد بالتدريج لحد ما الطفل يتعود