fbpx
الصحة والأسرة

كيف تتعامل الامهات مع اولادها فى فترة الدراسة

نهى الزينى

١/ادي لاولادى سندوتشات وحاجة حلوة ولا اديلهم مصروف احسن هما يشتروا اللى عايزينه ؟؟

لحد تانية ابتدائي انا أرى انك تدي سندوتشات و عصير و نبعد عن السكريات الكتير و الشكولاتة و خلافه، ممكن في تانية ابتدائي يطلب الطفل مصروف ساعتها ندي سندوتش و عصير و نديله مصروف و هو يجيب حاجة واحدة من الكافيتيريا، و طبعا دا بيختلف من مدرسة للتانية، لكن عموما في المرحلة الأولى دي لازم ا اطمئن ان معاهم سندوتش و عصير و مية، و بعد كدا بقى دي كماليات، لو المدرسة بتسمح بالسكريات و الشيبس (للاسف) ممكن تجيبي كارتونة شبيس في البيت واديله كيس كل يومين ولا حاجة، ولو اني طبعا احلم ان المدارس ما تسمحش بالسموم دي لأولادنا، و أحلم اننا نغرس في ولادنا حب الفاكهة و الخضار بدلا من الحاجات دي.

٢/لو ابنى صاحبه ضربه اقوله اللى يضربك اضربه ولا اعمل ايه؟
لا، مش هاقول اللي ضربك اضربه، هاعلم ابني من البداية انه يدافع عن نفسه، بإنه يوقف اللي يضربه و يزعق ويقوله ما تضربنيش، و يلجاً للسلطة اللي في المكان اللي هي المدرسة او المدرس، و لو تكرر الضرب، هاقوله يوقف اللي بيضربه تاني و انا اتدخل و اقول للمعلمة بتاعته ان دا مش مقبول و اني مش عايزة اقول لابني اضرب اللي يضربك، لان دا غلط، و هي لازم تكون فاهمة دا، و لو استمر العنف ضد ابنك ، للاسف احنا مضطرين نقوله يا حبيبي الضرب مش حلو و لكن لازم تدافع عن نفسك، هاتصد ايد اللي بيضربك و تضربه بعيد عن الوش وعن تحت الحزام، ضربة توقفه و بس، و طبعا اتمنى ان المعلمات و المعلمين يكون عندهم وعي لايقاف ظاهرة التنمر دي لانها دائرة عنف ماحدش عايز يدخل فيها

٣/اخلى بنتى تنام شوية بعد المدرسة ولا لا ؟؟

دابيختلف من طبيعة طفل للاخر، في اطفال لازم تفصل بعد ما ترجع بعد المدرسة، و في اطفال ممكن تكمل عادي بس نديها فاصل من تعب المدرسة بحيث انها ممكن تلعب لعبة او تتفرج على كارتون نص ساعة مش اكتر، ولو الطفل او الطفلة هاتنام بعد ما ترجع من المدرسة انا ارى انه لا يزيد عن نص ساعة الى ساعة الا ربع عشان تلحق تنام بالليل كويس و تنام عدد ساعات كافي، اللي هو من ثمن الى عشر ساعات في المراحل الابتدائية الاولى، عشان دا هايخليهم يستوعبوا كويس في المدرسة و يصحوا الصبح و هم كويسين

٤/ادى لابنى دروس؟؟والافضل يكون مع مدرس الفصل ولا مع حد برة؟
طبعا انا احلم اننا ما نكونش مضطرين ندخل ولادنا مطحنة الدروس الخصوصية، عشان دا ارهاق عليهم، تخيلوا من الصبح بيصحوا يروحو مدرسة ويرجعوا تعبانين عشان ياكلوا بسرعة و يروحو الدروس و يرجعو مهدودين عشان يعملوا واجبات المدرسة و الدروس، للاسف دي مش حياة صحية للاطفال والله العظيم، ولكن عشان اجاوب على السؤال، اذا كان ابنك مضطر للدروس اعتقد ان مدرس الفصل هايكون احسن عشان للاسف في مدرسين بيضايقوا الطلبة عشان يضغطوا عليهم ياخدوا دروس عندهم بس يا ريت الدروس مش كل يوم، ارجوكم يعني.. و قلبي على ولادكم والله… و لكن اذا مدرس الفصل مش بيوصل المعلومة، افضل اننا نشوف مدرس كويس .. وربنا يهدي المدرسين و يخليهم يشرحوا في الفصل يا رب

٥/استمر فى الدراسة مع تمارين النادى مع ابنى ولا استكفى بالدراسة بس؟
التمارين الرياضية مهمة لتفريغ طاقة الاطفال، و انصح بها بس ما ندخلش الولاد في ضغط مسابقات و بطولات و الكلام دا عشان ما يتحولش لضغط نفسي عليه الا اذا الطفل نفسه هو اللي عايز، و طبعا يا ريت ما تكونش التمارين يومية،

٦/ لو الميس بتعامل ابنى وحش وبتذنبه كتير فى الفصل اعمل ايه؟

محتاجين دبلوماسية في الاول مع الميس، نروح كدا بابتسامة هادية و نقولها اننا مقدرين جهودها و على استعداد للتعاون معاها و ان ابنك بيحبها و انتي عارفة ان ابنك مش بيجي بالتذنيب بل مفتاحه انها تمدحه و تحبه، و انتي هاتابعي معاها اسبوعيا لحد ما الولد يتحسن، و قوليلها انك مقدرة الضغط اللي عليها و عدد الطلاب الكبير في الفصل بس يعني انتي متوسمة فيها خير
و كرري الكلام دا مرتين،في التالتة لو لم تستجب الجأي للادارة، و لو ابنك في مراحل الكي جي انصح بتغيير الفصل حينها لان دي هاتكرهه في الدراسة و هاتخليه عنيف.

٧/لو ابنى بيرجع من المدرسة معاه حاجات زيادة زى قلم او مسطرة اعمل ايه معاه؟

نقوله حلو القلم دا بتاع صاحبك مين، هايقولك الاسم تقوليله ترجعه عشان ما ينفعش ناخد حاجة من حد، و لما هاترجعه هاتاخد مكافأة (وانصح ان المكافأة تكون معنوية)
لو قالك صاحبي هو اللي اعطاني القلم او كذا، قوليله معلش احنا ما نقدرش نقبلها، رجعها لصاحبك
ولو قالك لقيتها في الحوش او الساحة، قوليله حرام زمان صاحبها بيعيط عليها، لازم نرجعها انت تروح الصبح تقول للميس و تديهالها هي هاتشوف بتاعة مين
وحاولي تتواصلي مع معلمة الفصل و قوليلها على اللي حصل عشان يكون عندها علم

زر الذهاب إلى الأعلى