هل الحياه تجد مجراها حقا في الكون؟

بقلم: محمد جمال

بتحب الفضاء؟ … مهتم بفكرة وجود الحياه خارج الارض؟ ..خيالك بيسرح في فكرة الفضائيين ؟ …افلام هوليود العظيمه عن الغزو الفضائي شاغله بالك ؟ اثبت…

المقال ده مكانك المناسب. حاول تركز و تستمتع بكل كلمه…
يلا بينا
في كوننا اللانهائي بتسبح ملايين المجرات … كل مجره منهم بتحتوي علي ملايين النجوم و منهم عدد مهول بكواكب بتسبح في فلكه و من الكواكب عدد مهول مشابه للارض ومناسب للحياه …
في ملايين اعمال الخيال العلمي سواء كتب او افلام او روايات ظهرت الكائنات الفضائيه … وجودها شغف مستعمر عقول البشر من الاف السنين لكن تحت مسمي الالهه القادمه من السماء …
لكن مع كل الاعمال دي و الحضارات الي تحدثت عن وجود كائنات من السما تواصلت معاها … لغاية دلوقتي مفيش اي دليل واحد علي وجود حياه ذكيه خارج الارض … و كأننا وحيدين في الكون…
طيب بسبب كده في معضله عقليه ..انشئها العالم الايطالي انريكو فيرمي لما حط مفارقة فيرمي و الي بتقول الاتي
-هناك بلايين النجوم في المجره و التي تتشابه مع الشمس و هذه النجوم اكبر عمرا من نظامنا الشمسي ببلايين السنين

-مع احتمالية ضخمه بأن بعض هذه النجوم تمتلك كواكب تشبه الارض و اذا شابهت الارض بدقه فستظهر حياة ذكيه كما حدث هنا
-و بعض الحضارات التي ستعيش علي هذه الكواكب ستطور السفر عبر الفضاء و هذه هي الخطوه التي نحن فيها الان
– و علي اساس التقدم البطيء في السفر عبر الفضاء ستكون هذه الحضارات قد اجتازت مجرتنا منذ ملايين السنين ..
و طبقا للمفارقه المنطقيه دي .. فالارض تم زيارتها من الكائنات او الحضارات الفضائيه من فتره زمنيه كبيره لكن المعضله بقي ان مفيش اي دليل ملموس علي كل ده … و ده الي خلي فيرمي يسئل سؤاله العظيم الي شاغل عقول العلماء لغاية دلوقتي

” اين الجميع ؟ ” ..

وده السؤال الي هنحاول نجاوب عنه دلوقتي …

” هما فين الفضائيين ؟ ”

اول حاجه لازم نفكر فيها علشان نجاوب السؤال ده هي ” هما ” الفضائيين نفسهم … الحضارات الفضائيه نفسها ..
لما نيجي نتكلم عن حضاره فضائيه اول حاجه لام نذكرها انهم مش زينا … انهم غيرنا .. طبعا من المستحيل نتخيل منظور الفضائي لاي موضوع عامل ازاي خصوصا منظوره او رأيه في فكرة التواصل مع البشر …
و علي حسب الفكره دي عندنا اكتر من افتراض ….

اولهم ان الحضاره الفضائيه مش عايزه تتواصل مع حضارات تانيه في المقام الاول .. او يمكن هما مش عايزين اي حضاره تانيه تعرف بوجودهم … و علي العكس تماما حضارتنا ما شاء الله عرفت الكون كله انها موجوده

الافتراض التاني و هو ان علي عكس البشريه و رغبتها الاستهلاكيه الدائمه و فضولها اللا نهائي .. ممكن ببساطه شديده ان الحضاره الفضائيه معندهاش اي رغبه تكتشف الفضاء
او يمكن ظروفهم زي ما تكلمت قبل كده عن الجاذبيه و ازا بتمنع السفر للفضاء مستمحش انهم يكتشفوا السماوات ..

الافتراض الثالث ان بالرغم من استخدام البشر لمئات طرق الاتصال سواء بموجات الراديو او الموجات المرئيه الا ان التكنولوجيا بتاعتنا بدائيه … يعني حضاره فضائيه متقدمه اكيد هتكون صنعت و اكتشفت طرق جديده متقدمه جدا للاتصال احنا لسه مش مدركين وجودها و بالتالي احنا بالنسبالهم صم و بكم و عمي …
و علشان اوضح الفكره عن شفرة مورس … بعد ثورة الاتصالات الي احنا فيها حاليا … هل ممكن تتصل بصاحبك عن طريق شفرة مورس ؟ …

الافتراض الرابع ان حتي لو في حضارات فضائيه تطورت قبلنا بملايين السنين و تطورت ملاييين المرات … الا ان الفرق بينا و بينهم لا يزال فرق زمني و مكاني واسع جدا جدا ..
يعني اصلا لو في حياه علي بعد 100 الف سنه مننا هيكون مستحيل بالنسبالنا التواصل معاها و 100 الف سنه دي اقرب مسافه ممكنه …

طيب ركزوا معايا في معادله اسمها معادلة درايك و دي المعادله الي اثبتت رياضيا وجود حياه و حضارات متقدمه غيرنا في الكون مش كده وبس بل كمان قدرت تحدد عدد الحضارات المتقدمه في الكون … و المعادله دي فيها متغير اسمه L المتغير ده بيوصف طول الزمن المحدد الي مسموح لينا فيه التواصل مع حضاره فضائيه معينه و قيمة ال L مش بتستخدم في كده بس لا كمان بتوصف عمر الحضاره دي … انا عارف انكم ضيعتوا مني خلاص … بس علشان ابسطهالكم من الاخر
معني كده و علي حسب المعادله ان الحضاره الي نقدر نتواصل معاها المفروض تكون اتدمرت و انتهت من ملاييين بل بلايين السنين بسبب الحرب او المرض او الكوارث الطبيعيه … و ده معناه ببساطه و اسف لتخييب امالكم ان الوقت الي المفروض نقدر فيه نتواصل مع الحضارات الفضائيه هيكون بعد انقراض البشريه … هي ببساطه مسئلة وقت ..