اسطورة الهولندي الطائر…
اولا تعالي كده نفتكر حاجه سوا …
في كرتون سبونج بوب كان دايما في شبح سبونج بوب مطلع عينه اسمه الهولندي الطائر و في سلسلة افلام قراصنة الكاريبي او pirates of the Caribbean ظهر ديفي جونز الرجل بوجه اخطبوط و قبطان سفينة الهولندي الطائر الملعونه و علي حسب ما انا فاكر في الافلام قصته كانت انه حب الهة البحار كاليبتو و الي عينته كمراقب للبحار علشان يوصل ارواح الموتي الغارقين للعالم الاخر لكن ديفي رفض مصيره الابدي و اتخلي عن مهمته و بالتالي تم مسخه هو و الطاقم بتاعه و السفينه لبرمائيين …
طبعا كل ده هراء افلام لكن موضوعنا عن سفينة الهولندي الطائر نفسها و الجزء الحقيقي الوحيد في هراء الفيلم الا وهو سفينة الهولندي الطائر الملعونه …
للي ميعرفش الاسطوره الحقيقيه … كل البحاره الي عاشوا من القرن ال17 لل21 عارفين الاسطوره المرعبه لسفينة الهولندي الطائر الملعونه اسطوره بتحكي عن سفينه ملعونه بأنها تسافر في البحار للابديه … في ناس كتير سجلوا في يوميات سفنهم رؤيتهم للهولندي الطائر علي مر القرن ال18 لغاية القرن ال20 …
معظم اوصاف البحاره اتفقت علي ان السفينه دايما كان بيظهر منها اشعاع كده يحسسك انك شبح او انها مجرد صوره فراغيه … لكن ظهورها للبحاره عباره عن نظير بالهلاك …
طب ليه مفيش سفينه من الي شافت الهولندي الطائر قررت تطاردها او يأسروها ؟ ..
ببساطه لان البحاره كانوا بيخافوا منها … كانوا معتقدين ان خلاص طالما ظهرتلهم يبقي كلهم هيموتوا ..
يعتبر من اوائل المشاهدات للسفينه الشبح الي تم ذكره في كتاب
“travels in various parts of Europe , Asia and Africa during series of thirty years upward”
و الي تم نشره سنة 1790 للكاتب جون ماكدونالد لما كتب في مقطع معين الاتي
” كان الجو عاصفا جدا للدرجة ان البحاره قالوا انهم رأوا سفينة الهولندي الطائر و كانت القصه تقول ان قبطان هذه السفينه كان يقودها في مثل هذا الجو و حاول ان يصل بها الي الميناء و لكن لم يستطع السيطرة عليها فضاع معها الي الابد و منذ ذلك الوقت تظهر السفينه في كل عاصفه ”
تم ذكر السفينه تاني في كتاب ” a voyage to botany bay”
الي صدر سنة 1795 و تم كتابته من شخصيه مرموقه في المجتمع اللندني و اسمه جورج بارينجتون و الي كتب قصه مشابهه لقصة جون ماكدونالد لكن اضاف ملاحظه بسيطه وهو ان البحاره ساعتها كانوا بيؤمنوا بالهلاك و الاشباح اكتر من ايمانهم في الملاحه …
و زي جزرج تم ذكرها تاني في كتاب ” scenes of infancy”
للكاتب الاسكتلندي جون لايدن و الي اتدعي فيه ان السفينه ظهرت معظم الوقت في الساحل الجنوبي لافريقيا ” حيث يكثر ظهور الاعاصير و معها شبح سفينة الهولندي الطائر ”
و طبعا لغاية دلوقتي النسا بتحاول تلاقي دليل منطقي لظهور السفينه بل حتي دليل منطقي لسبب ضياعها او حتي مين القبطان بتاعها لدرجة ان في ناس ادعوا ان طاقمها كانوا مجرد مجرمين و ده سبب اللعنه …
و في بقي بعض الناس حطوا نظريات علي ان قبطان الهولندي الطائر يبقي شخصيه تاريخيه ظهرت في القرن ال17 اسمها بيرنارد فوك و الي كان هولندي الاصل و قبطان في شركة شرق الهند و الي كان معروف بسرعته الغريبه في الابحار من سواحل هولندا لسواحل جافا في اندونيسيا لدرجة ان تم تسجيل سرعته في التاريخ انه عمل المشوار ده في 3 شهور و 10 ايام بالظبط و دي سرعه مهوله بالنسبه للزمن ده للدرجة ان الناس طلعوا عنه اشاعة ان الشيطان بيساعده في ابحاره ..
لكن بعيدا عن كل ده هل السفينه ظهرت فعلا للبحاره ؟
الكاتب نيكولاس مونسارات كتب في كتابه “the cruel sea” سنة 1951 انه هو بنفسه شاف شبح سفينة الهولندي الطائر خلال خدمته في البحريه في الحرب العالميه التانيه ..
لكن اشهر و اصدق مشاهده تظل مشاهدة الامير جورج و الي بقي بعد كده ملك لما كا في رحله بحريه لمدة 3 سنين في شبابه و مصاحبه اخوه الاكبر الامير البيرت فيكتور و المعروف بديفيد و بقي اسمه الملك ادوارد لما اعتلي العرش … المهم يوميات الامراء دول بتقول انهم بنفسهم شافوا الهولندي الطائر يوم 11 يوليو سنة 1881علي الساحل الاسترالي بين مالبورن و سيدني و وصفوا المشهد بأن السفينه ظهرت بيحيطها اشعاع احمر و لما سفينة الامراء وصلت للمكان الي المفروض ان السفينه الشبح فيه ملاقوش ليها اي اثر بغض النظر عن ان السماء كانت صافيه و البحر هادي و مفيش اي عواصف لكن بعض الناس اقترحوا ان مشاهدة الامراء للسفينه الشبح ما هي الي وهم من اوهام البحار …
عالعموم سيبكم من كل ده و خلوني احكيلكم القصه الفلكلوريه للهولندي الطائر…
تعالوا احكيلكم قصه صغيره من قصص سفن الاشباح و المره دي هحكيلكم قصة سفينة الهولندي الطائر …
في القرن ال17 في جنوب افريقيا كان في قبطان عنيد وقوي تابع لشركة شرق الهند الهولنديه اسمه هندريك فندرديكن و الي كان في وسط رحله عبر راس الرجاء الصالح …
في وسط الرحله بدأت تظهر بوادر و علامات لعاصفة شديده جدا فالنائب و افراد الطاقم طلبوا منه انه يرسي بالسفينه في اقرب ميناء لكن القبطان هندريك العنيد رفض و قال انه هيكمل الرحله كلها حوالين راس الرجاء الصالح في وسط العاصفه حتي لو وصلته لنهاية حياته ..
بعد فتره و بسبب سوء العاصفه و سوء الاحوال عالسفينه الطاقم بدأ تمرد لكن القبطان فيندريك كان اقوي من التمرد لدرجة انه قتل قائد التمرد لوحده و رمي جسمه من السفينه…
و بعد ما سطح السفينه اتحول لمجزره بين المتمردين و الموالين للقبطان ظهر شخص غريب علي السفينه … شخص غريب محدش يعرفه …. الشخص ده اتوجه للقبطان و وقف قدامه و بدأ الحوار بينهم ..
الغريب ” انت عنيد جدا ! ”
القبطان ” انا عمري ما طلبت رحله هادئه بصراحه انا عمري ما طلبت اي حاجه … علشان كده احسنلك تختفي من قدامي قبل ما اقتلك انت كمان ”
و فعلا القبطان هيندريك اطلق النار علي الغريب بس الرصاصه اصابت ايده …
هنا الغريب صرخ فيه ” انا بلعنك … بلعنك انك تفضل هائم في البحار بدون وجهه بسفينه محطمه و طاقم ميت … بلعنك انك تجلب الموت لكل شخص يشوفك … و عمرك ما هترسي علي اي ارض ولا هتعرف لحظة سلام ” …
لغاية دلوقتي القبطان و طاقمه الميت بيبحروا حوالين راس الرجاء الصالح بدون وجهه …بس الموضوع تعدي مجرد اسطوره
لان سنة 1939 عدد كبير من السياح علي شاطيء جلنكايرن قالوا ان كلهم شافوا سفينة الهولندي الطائر بتقرب من الشاطيء بسرعه كبيره جدا بس اختفت قبل الاصطدام … بل كمان كل العمال في المناره تقريبا قالوا انهم بيشوفوا السفينه لغاية دلوقتي في اوقات العواصف …
