بعد الهجوم على حلقتها مع منى الشاذلي.. ايتن عامر توجه رسالة لجمهورها

كتبت – إيمان رضوان

تصدرت الفنانة ايتن عامر ، مؤشر البحث العالمي “جوجل”، وذلك بعد هجوم الجمهور عليها ووصف مشكلتها بأنها تافهه وذلك عقب ظهورها مع الإعلامية منى الشاذلي في برنامج “معكم” الذي تقدمه على قناة cbc الفضائية.

وردت “عامر” عبر صفحتها قائلة “أيوه فى مشاكل أهم وأعمق من المشكلة بتاعتى اللى تناولتها النهاردة الأستاذة منى الشاذلى، ولكن خلينا نشوفها بشكل تانى، ليه منقولش إن تجربتى دى ممكن تبقى حافز لناس كتير نفسها تخس و ظروفها المعنوية أو المادية مش مساعداها خصوصا أن الدكتور وافق انه ينزل الأنظمة الغذائية كاملة دون أى مقابل”.

وأضافت، “ليه منقولش إن دى تجربة فعلية تخلى الناس اللى بيتضحك عليها باسم عمليات التكميم وتحويل المسار وبيبقى عندهم استعداد يبيعوا دهبهم ويعملوا جمعيات عشان يعملوا العملية مع إن من الممكن منضرش صحتنا و نخش أوض عمليات ونعمل دايت وتخس ومنتكلفش كل الفلوس دى”، مؤكدة: “ليه الحلقة دى متكونش بتهون على كل واحدة لسه مخلفة ووزنها زايد وعندها اكتئاب وبتوريها إنها مش لوحدها اللى بيحصلها كدة وانى كممثلة لا أتميز عنها بشيء سوى الإرادة وأشجعها تبدأ معايا”.

وتابعت آيتن، “بلاش هجوم بلا داعى، أنا مش هقدر أحل مشاكل الكون ولا مشكلة الغلاء، ‏لكن ممكن أكون مصدر إلهام لبنات كتير وأساعدهم على الوصول لحلم صغير، لأن هو ده اللى هقدر عليه”.