بعد 7 سنوات.. الباز : مرسي خدع المصريين في «القميص الواقي»
محمد ناصر
كشف الإعلامي محمد الباز، كواليس مشهد محمد مرسي، عندما وقف في ميدان التحرير يوم الجمعة، 29 يونيو 2012، وفتح “جاكت بدلته” أمام أنصاره من جماعة الإخوان، وقال آنذاك “أنا مش لابس قميص واقي أنا مبخفش إلا من الله”.
وقال الباز، إن هذا المشهد يعد كدبة كبيرة للغاية، حاول بها مرسي أن يظهر كبطل شعبي.
وكتب الإعلامي محمد الباز، على صفحته الشخصية على موقع التواصل الاجتماعي “فيس بوك”: “فاكرين محمد مرسى لما وقف فى ميدان التحرير عصر الجمعة ٢٩ يونيو ٢٠١٢، وفتح الجاكت بتاعه وقال للموجودين اللى هم كانوا أنصاره وأنصار أنصاره: أنا مش لابس قميص واقى أنا مبخفش إلا من الله؟ دى فى الحقيقة كانت كدبة كبيرة جدا، حاول مرسى بيها إنه يظهر كبطل شعبي”.
وأضاف الباز، “لأن الحقيقة إن مرسى كان بيحاول يستعرض بشئ مش حقيقى، لأن اللى حصل إنه فاجأ فريق الحرس الخاص بتاعه إنه خرج من دايرة الحرس واتجه لمقدمة المنصة اللى كان واقف عليها، ولما حاول الحرس يمنعه رفض، وقال أنا لا أخشى إلا الله”.
واستكمل: “بعدها يمكن بشهور كنت قابلت واحد من قادة الحرس الجمهورى اللى كان موجود على المنصة، ولما فكرته باللى حصل، ضحك جدا وقال لى: “مرسى ده كان أكتر واحد خواف شفته فى حياتى، وبالنسبة لموضوع القميص هو رفض القميص الواقى اللى الحرس قدمه له، لكنه طلب من جماعة الإخوان إنهم يجيبوا قميص من عندهم، وفعلا جابوا له قميص رقيق جدا من نوع خاص، ولما سمعته بيقول اللى قاله، قلت لنفسى: يا ابن النصابة”.
