دلعيه وقوليله تسلم إيديك ياسيد المعلمين..الرجاله عايزه إيه ؟!!
هويدا سراج
بقول الرجاله وليس أشباه الرجال الراجل اللي بجد بيبقى عايز ست بحق وحقيق ست تفتح نفسه على الحياه كوني له (روقه يكن لكي ابو كمال) أي راجل في الدنيا بيكون محتاج إن الست تكون سنده ونصه التاني في الحياة مرايته الي بيشوف بيها الدنيا تكون سكنه والحضن الدافي له.
ذكية، مثقفة، رقيقة، رومانسيه، جميله، انيقه، عاقله، مجنون، تحتويه وتبقى ناجحه وطموحه و محدش يختلف عليها.
عايزها تشاركه كل حياته، وتقف جمبه في كل خطوة، وتشجعه وتدِّيه دايما الحافز يبقى جواه يقين أن هي عيزاه احسن راجل في الدنيا بتخاف عليه بجد بتحبه بجد ودا بيببان في المواقف مش بالكلام ؛الراجل عايز الواحدة تكون زوجته وحبيبته وأمه وأخته وصديقته وكل دول لازم يتعاملوا بذكاء تعرفوا تبقوا كده؟ وتشوفوا إيه اللي المفروض تعملوه، وإيه اللي المفروض ما يتعملش
اوعي تكوني زنانه وتفضلي ترغي الكلام الكتير والمجادلة بهدف المجادلة بس، ومش بهدف الوصول لنتيجة من الكلام، دي حاجة بتخلق جو من الإزعاج وخنقة للراجل، وخاصة لما يبقى بيتكلم في موضوع مهم جدًّا وعايز يوصل لحل فيه، وأنتي عمَّالة تجادلي وبس بدون ما توضحي وجهه نظرك ولا تقولي رأيك، ولكنك مصممة تتكلمي وتظهري نفسك مش أكتر..
الطبع ده هو اللي بيخلي رجالة كتيرة تتبع أسلوب الصمت الرهيب مع أي واحدة، ويعمل اللي في دماغه وما يفكرش يتناقش ولا ياخد رأي أي واحدة في أي حاجة.
الست اللي بتنسي أنوثتها في زحمه الشغل وتربيه العيال وتنسني حالها لدرجه انه يشوفها عادي الست اللي بتهتم بحالها لفتره مؤقته هي ماقبل الزواج فقط لكي تتزوج وبعد الجواز بتبقي مهمله في شكلها وحالها الطبيعي اكوني أنثى بجد حلوه تشرحي قلبه مش تسدي نفسه.
اوعي تكوني ست ماديه ا اهم حاجه في حياتها الفلوس طبعًا الماديات والمشتريات اللي مالهاش لازمة وعمَّال على بطال شيء مزعج جدًّا وبتضايق الراجل؛ حتى لو معاه فلوس.
ولما يحس أن الست معتبراه مجرد بنك ومفيش حاجة بتكفيها وكل شوية هات هات هات وعايزة تجيب أي حاجة وكل حاجة.
وخاصة لما تربط علاقته ودليل حبه ليها بالماديات وبأنها عايزة كل شوية هدية، ويا ريتها مثلًا هدية بسيطة لا ده لازم تكون غالية جدًّا جدًّا!!
النوع ده من الستات بيكرهه كل الرجالة، حتى لو كانوا مليونيرات والفلوس مش فارقة معاهم.. خليكي عنيكي مليانه اوعي تغيري عمال على بطال خليكي راسيه وواثقه في نفسك
مفيش راجل ما بيحبش يحس بغيرة الست عليه، لكن لما الغيرة دي تبقى زيادة عن الحد وتبوَّظ حياة الراجل وأحيانًا بتدمرها!!
في غيره حلوه طبيعيه لكن مش الغيرة اللي تخنقه وتخليه يطفش وما يرجعش تاني.. غيري بعقل مش عمال على بطال
متبقيش ست حشريه اديله مساحه من الحريه والخصوصية .
التدخل في كل حاجة وأي حاجة تخصك أو ما تخصكيش.. دي من أكتر الحاجات اللي بتضايق الراجل الست تدخُّلها في اللي ليها فيه واللي مش ليها فيه، و ده بيعمل مشاكل كتيرة جدًّا.. حاول تبقى متوازنه الست الدلوعه رزق مش تكوني مصطنعه
الرجالة بتحب الدلع أكيد، لكن فيه دلع رخم جدًّا ومالوش طعم ولا لون ولا ريحة خصوصا لما بيبقى مصطنع، خليكي طبيعيه طلعي الحلو اللي جواكي بس ولا تقلدي حد ولا تبقى مصطنعه كوني انتي.
اوعي تكوني ببوز نكديه بطبعك دي هتتنهي علاقك بالراجل بدري بدري، والستات النكدين بطبعهم ما بتاخدش وقت طويل، خاصة لما تمتلك أدوات النكد؛ من بوز شبرين، إلى تكشيرة ما تفارقش وِشَّها، إلى عين على طول مليانة دموع، إلى خناق وزعيق عمَّال على بطَّال… خليكي ست فرفوشه افردي بوزكةاوعي تكون صوتك عالي ثاني عدو للمرأة بعد النكد، سواء كان الكلام عادي أو خناق.. الصوت العالي مش مستحب لأي واحدة، وخاصة في كلامها مع الراجل؛ لأنها بتحسسه بعدم احترامها ليه، وكل الرجالة بيكرهوا الست اللي صوتها عال وعاملة إزعاج طول الليل والنهار بسبب وبدون سبب.. خليكي رقيقه .
اوعي تكوني منهم ماما قالت صاحبتي جوزها جابلها بنت خالتي رايحه تصيف في كذا دا عنده عربيه كذا وجاب لمراته كذا هم اطلقو ليه وصاحب اتجوز تاني ليه واخويا جاب وجاب لمراته ومين ومين هو ماله بكل دا خليكي في نفسك وحياتك وجوزك خليكي راضيه ومقتنعه بحياتك خليكي واثقه في حالك اوعي يبقى محور كلامك معاه حكاوي على الآخرين .
اوعي تكوني روتينيه ومتبهدله ليه بعض الستات بتهتم بنفسها قبل الجواز لحد ماتتجوز وتبدأ تتحول ليه ثقافة اللبس المبهدل بتبقى جوه البيت وبره لأ؟! ليه الواحدة بيجيلها غباء تجاه الشيء المسمى الهدوم؟! مع إن أي واحدة أكتر حاجة بتشتريها في جهازها الهدوم، ولكن إيه اللي بيحصل بعد الجواز؟! .
فجأة كل الهدوم الجميلة تختفي، وتظهر الواحدة بجلابية وبكم ومش بعيد تخبي شعرها كمان بخمس ست إيشاربات واللي بتهتم فتره وبعد كده خلاص واللي بتفضل على نفس الاستايل بالسنين احنا بني ادمين والله يعني محتاجين التطور دايما في شكلنا واسلوبنا وطريقتنا مش عيب نتغير للاحسن العيب اننا نبقى مصممين على نفس الروتين بنفس الشكل بنفس الطريقه غيري وجددي من حالك
اوعي تكوني كثيره الشكوى
الشكوى الكتير من كل حاجة وأي حاجة، وعاااااااا عااااااااا عاااااااااا طول الليل والنهار، ده شيء مستفز وممل جدًّا، وبيكره أي واحد في عيشته كلها مش في الست بس. اوعي تكوني عنديه
العند لمجرد العند، والعند لمجرد إثبات إنها موجودة، والعند لمجرد الغلاسة والرخامة، والعند بدون سبب واضح… من أكتر الحاجات اللي بتخنق الرجالة. اخلقي حوار بينك وبين جوزك مافيش مشكله ملهاش حل المهم انك توصلو لحل يرضيك انتو الاتنين الشكوى الكتير وتدخل الناس في حياتكم بيفيد اي علاقه في الدنيا
اوعي تكوني برج مراقبه طول الوقت بتراقبيه بيعمل حاجه او لا بتراقبيه ليه
فيه ستات أول ما تتخطب وتتجوز تعمل فيها المفتش كرومبو، وتفضل تدوَّر ورا الراجل في كل مكان وأي مكان، وخاصة تفتيش موبايله، جيوبه، جهاز الكمبيوتر بتاعه؛ لمحاولة معرفة علاقاته في الشغل وكل حاجة بيعملها. وفي ستات دايما بتسك في الراجل اللي معاه طول الوقت عندها احساس انه بيخونها ودا قله ثقه في نفسها قبل مانيب اللوم على اي راجل ونفضل نتهم الرجاله بالخيانه والعين الزايغه اعملي اللي عليكي وخليكي ست الستات أملي عينه وقلبه واحتويه اديله الثقه واديله مساحه الراجل لما بيحس أن ابست مستموته عليه ومرقباه
والحقيقة أن ممكن يكون الراجل كويس جدًّا جدًّا جدًّا، ولكن بسبب مراقبة الست له هيعمل حاجة من اتنين؛ يا هيسيبها، يا هيعمل حاجة غلط فعلًا، يا هنلاقيه صابر وساكت وبقى بيكلم نفسه
اوعي تكوني خلف خلاف عكس الاتجاه دايما
وده طبع في بعض الستات، كل ما الراجل يقول لها حاجة تقول له عكسها..
يقول لها: تعالي نخرج.. تقول له: لأ نقعد في البيت أحسن.. والعكس.
وهكذا في كل حاجة بقى، ودي نقطة أساسية في خنقة الراجل من أي ست، إنها تبقى خلف خلاف دايمًا وأبدًا.. ريحي نفسك وخليكي الراحه له
فالنهايه ربنا خلق الكون من راجل وست خليه يشوفك ست بكل ستات العالم دلعيه واهتمي بي خليكي ناجحه وطموحه حلوه وذكيه ليكي كيان اشتغل على نفسك كلنا فينا عيوب احنا بشر بس الذكاء اننا نعرف عيويبا ونحاول نجملها ونغيرها للأحسن الست اساس الكون والراجل ممكن يكتفي بست واحده تملي عينه وقلبه وعقله
