طريقة عمل البيتزا فى البيت

المقادير:

٢ ونص كوبايه دقيق – معلقه ملح – معلقه اورجانو (زعتر)

كوبايه الا ربع ميه دافيه – معلقه ص خميره فوريه – 2 معلقه ص سكر

معلقه ك زبده سايله – معلقه ك زيت – معلقه صغيره زيت زيتون

معلقة كبيره زبادي – معلقه كبيره خل

الطريقة :

 في بوله نحط  الدقيق وعليهم معلقه الملح ومعلقه الاورجانو ونقلبهم

في كوبايه نحط الميه الدافيه وعليه معلقتين السكر ومعلقه الخميره ونقلبهم ونغطيهم ونسبهم 10 دقائق لحد ما تعمل رغاوي وننزل بيها على الدقيق

* ملحوظه : الميه لو سخنه الخميره هتمون ولو بارده مش هتتفاعل لازم تكون دافيه الي هو تقريبا درجة حرارة 40

 ندوب الزيت مع الزبده وننزل بيهم على الدقيق ومعاهم معلقه الزبادي ومعلقه الخل

 نقلب العجين كويس ونعجن فيه لحد ما يلم معانا ولو حسينا انه احتاج دقيق نضيف دقيق كدة كدة العجينه مش هتاخد دقيق اكتر من حاجة الميه

 نعجن حوالى 10 دقايق وندهنها زيت ونحطها في البوله ونقفل عليها كويس جدا ونسبها تقريبا من ساعه ل ساعه ونص

نشغل الفرن على اعلى درجة حرارة قبلها بنص ساعه

 نرش تحت العجين دقيق ونفردها كويس بادينا لحد ما تدينا شكل دائري نكون داهنين الصينية زيت

 نفرد العجينه في الصينية ونفردها على حواف الصينية ونخرمها بشوكه ونحط عليها معلقتين صلصه ونوزعهم كويس وعليهم الجبنه الموزريلا وفوق الجبنه اي حاجة نحبها انا عملتها بهوت دوج وسلامي وزيتون

 ندخلها الفرن على الرف الي تحت خالص 5 دقائق وبعد كدة نحطها في الرف الي في النص ونهدى النار شويه حوالي 10 دقائق وبس هتكون استوت