كيفية التعامل مع الاطفال

نهى الزينى

من أكبر الأخطاء اللي بنقع فيها في تربية ولادنا إننا بعد فترة بننسى إنهم أطفال وغالبا بنتعامل معاهم بإحدى طريقتين:
إما بنعاملهم على إنهم عبيد حبشيين زي عم عثمان اللي كان بيجي في الأفلام بتاعة زمان ونقعد نؤمر فيه ونصرخ فيه زي العبيد بالظبط، ولازم نكلمه بصيغة الشخط علشان يسمع الكلام، وطبعا مننساش نرفع حاجب وننزل حاجب علشان يسمعوا الكلام وينفذوا الأوامر، لدرجة ان احنا ممكن نغلط في إسم ابننا ونقوله يا عثمان، ونبدأ بقا نسمع صريخ الأم طول النهار والليل يا محمااااد هات الكراسة، يا محمااااد هات القلم، يا محماااااد هات الكوباية، بقولك الكوباية يا….. ونبدأ نرصله وابل مما لذ وطاب وطربت له الآذان من الشتائم والسباب ، وميضرش لو لاقينا شباشب طايرة رايحة جاية طول النهار زي موسم الهجرة عند طيور السمان .

وإما إننا نعامل ولادنا كإنهم إنسان آلي بينفذ الأوامر من غير ما يفكر، مجرد ما نضغط على الزرار هيشتغلوا، ماهيناااار اقعدي، ماهيناااار اقفي، ماهينار امسكي الشوكة بطرف صوابعك واشربي الشوربة بطرف شفايفك، ماهيناااار لما نروح عند طنط جولينار تقعدي جنبي وإياكي تتحركي، وفاضل شوية وتفرج صحابها عليها وهي بتضغط على الزرار وماهينار تتشقلب، ويا سلام بقا لو ماهينار غلطت تلاقي الأم بصتلها شزرا ومش بعيد تلاقيها اتحولت لإحدى الشخصيات الخارقة وتطلع شرار من عينيها

على فكرة ولادنا دول بني آدمين زينا والله وليهم أحاسيس ومشاعر، وممكن جدا يغلطوا، ومش لازم كل كلامنا ينفذوه بحذافيره، ومش لازم نقفلهم على الواحدة
سيبوا ولادكم براحتهم، سيبوهم يغلطوا ويتعلموا من غلطهم، انصحوهم وعلموهم غلطهم ليه غلط وايه الصح بتاعه، وسيبوهم براحتهم ويتصرفوا بطبيعتهم وبحكم سنهم، واقبلوا ليهم مساحة من الخطأ.
ربنا يحفظ ولادنا وبناتنا ويعيننا على تربيتهم تربية سوية سليمة