هويدا سراج تكتب _ الحقيقة الكاملة لمسلسل اللي مالوش كبير
يعد مسلسل اللي مالوش كبير واحد من أفضل المسلسلات في رمضان 2021 والتي عبرت عن حقيقة نعيشها بشكل يومي فى حياة المواطن المصري ، وتعتبر القصه رائعة والمؤلف اللي كاتب قصه المسلسل عمرو محمود ياسين اللي اثبت انه استاذ بدرجه امتياز في الدراما المصريه وكارت رابح لاي عمل يشارك فيه
– المسلسل بيناقش العديد من القضايا المهمه في مصر..بداية من عالم البلطجة ، نفوذ بعض رجال الأعمال واستغلال مناصبهم ، العنف ضدد المرأه والعنف الأسرى ، عائلات بتستغل بناتهم عشان تقدر تعيش.
– القصة مبهره وتشد ازاي عائلات يوصل بيهم الحال انهم يبيعو بنتهم عشان يعيشو مستوى أفضل ازاي أب وأم واخوات يقبلوا على اختهم الضرب والاهانة عشان وظيفة او بيت او عربية شيك جوزها جايبها لهم.ودا مهم جدا لكل عائله أو بنت بتدور عالفلوس انهم يشفوهو أحداث المسلسل وينتبهو جيدا .
ومن أول مشهد في المسلسل لياسمين عبد العزيز ، بالرغم من كل الرافاهيه اللي هي فيها الا انها تعيسه مفتقده الامان والأهم مفتقده احساس انها انسانه، نموذج الست المقهوره من الزوج والأهل ياسمين عبدالعزيز، من أهم وأفضل أدوارها ، واضح النضج في المسلسل. كم مشاعر وانتقام وتحولات في شخصيتها غير طبيعي فنانة رائعه .
الجانب الآخر الزوج واللي بيمثله العظيم خالد الصاوي
– رجل أعمال ملياردير بيتحكم في الناس بفلوسه ونفوذه عارف ان مراته مش بتحبه ورغم كده متمسك بيها ومش عايز يطلقها. لأنه شاريها وشاري عيلتها بالفلوس، لما تفكر مين كان ممكن يعمل الدور مكانه متلاقيش ، بني ادم استثنائي، في مشهد واحد بيحب ويكره ويحتكر ويضرب ويطبطب ويهزر ويكشر وتصدقه لأنه ممثل عظيم.
اما بقى الفنان أحمد العوضي ، هو فنان من العيار التقيل دوره في المسلسل نموذج البلطجي الشيك ودا نموذج له معايير خاصه شخصيه الخديوي في المسلسل شخصيه مهمه والحقيقه لما تعد تفكر مين كان ممكن يعمل الدور دا بالطريقه دي والتكنيك العالي دا مافيش غير أحمد العوضي ذكي وشاطر وعارف هو بيعمل ايه بيشتغل على الشخصيه باحترافية بعد دوره في مسلسل الاختيار (عشماوي) كان من الصعب انه يختار دور بنفس القوه والتأثير عالمشاهد ولكن احمد العوضي نجح في تجسيد شخصيه الخديوي .
طبعا شابوه لمخرج العمل مصطفى فكري حقيقي اثبت انه شاطر وموهوبودا باين اوي من اول حلقه الإيقاع والكادرات والتفاصيل والزاويه كل حاجه مظبوطه وحلوه واتمنى انه يبقى على نفس المستوى للنهايه المسلسل .
