المهندس محمد عبد المجيد يكتب :اليابانيون عالم الدقة والبساطة في صناعة السيارات

عالم من الدقة والبساطة فى ان واحد …هو مايميز الشعب اليابانى وصراحة الشىء العجيب انك تلاقى شعب عندة الدرجة دى من الدقة العالية والالتزام وفى نفس الوقت البساطة مع الافكار المبتكرة فى الحياة الى بتناسب كل المجتمعات سواء كانت مجتمعات متحضرة جدا اواقل حظا فى الحضارة
وعشان كدة بنلاقى التصميمات اليابانية دايما بتكتسح فى دول مش متشابهة حتى فى اى شىء ..نلاقى العملاق اليابانى تويوتا …رقم واحد على العالم فى المبيعات وفى خدمات مابعد البيع عندهم نسبة مشاركة من السوق العالمى حسب ارقام 2019 حوالى 200 مليار دولار والثانى وراهم مجموعة فولكس فاجن جروب حوالى 95 مليار دولار يعنى الاول ضعف الثانى كمان …والى وصلتلة تويوتا دة مش من فراغ ابدا وانما من الالتزام الشديد بالاهتمام بالعميل ووصلت ان تويوتا ممكن ترجع للعملاء فلوسهم او تستعيد سيارات اتباعت لعملاء حتى لو خسرت مليارات الدولارات ودة الى حصل فعليا سنة 2009 لما تم استعادة عدد كبير من موديلات تويوتا فى هذة السنة بسبب عيوب فنية فى الاكسراتير وبعض دواير الكهرباء فى السيارات ورغم الخساير الرهيبة الى حصلت ليهم فى هذة السنة الاان تويوتا عادت تانى وبمنتهى السرعة لمكانها الطبيعى فى القمة فى السنين الى تلت هذا الكلام
نلاقى تويوتا وهوندا تحديدا ومعاهم نيسان تكستح المبيعات فى امريكا وفى الخليج ..وتم عمل للخليج مواصفات خاصة من السارات اليابانية بيكون فيها عادة الموتور بسى سى اعلى مع وجود اوبشنز اكثر واحيانا شاسيهات اطول للسيارات تبعا لاحتياجات الجمهور الخليجى …وتعتبر امريكا والخليج تحديدا اكبر اسواق للمصنع اليابانى الى بيجيد فيها تماما تصميم مايحتاجة المستهلك او مالك السيارة (بالضبط بيدرسو انا احتياجاتى اية من السيارة وببنى عليها فكرة السيارة بالكامل) وهو دة ذكاء ونجاح اليابانيون الى اقتبسة منهم الكوريون والصنيون بعد كدة بس بدرجة اقل وهى مدرسة البساطة فى التصميم مع الدقة العالية فى الاداء ودة بالضبط الى مايشبهة الشعب اليابانى نفسة فى امور حياتة
تويوتا او هوندا او نيسان او سوزوكى او سوبارو او ميتسوبيشى …كلهم عندهم نفس الفكر نعمل مواتير بسى سى اقل واستهلاك بنزين اقل بكتير جدا من الامريكان مثلا ….بس فى نفس الوقت تعمل عربية فيها اوبشنز ودقة تصميم وكمان بنقلل فى التفاصيل (مش زى الالمان مثلا) ولكن بندى المستهلك الفايدة فى التفاصيل الى محتاجها سواء من راحة جوة السيارة وعوامل امان (ودى طبعا رقم واحد) مع تقليل المجهود اثناء القيادة (بتوافر الالكترونيكس فى القيادة ) فى نفس الوقت زى مبنقول مع البساطة فى الدواير الكهربائية وتقليل خريطة الكهرباء على قد الامكان ….وطبعا جة الصينيون نقلو الفكر دة بعد كدة بس احيانا وصلو بالبساطة لمرحلة (العك) بس هم الصينيون شاطرين وبيعرفو يلاقو الجمهور الى بيشترى منهم
باختصار ياجماعة التصميمات اليابانية فى عالم السيارات زى محنا بنقول انعكاس لفكر شعب بحالة وحدوتة ابداع بيختص بيها اليابانيون دون غيرهم …حكاية شعب استحمل كارثة 2 قنبلة ذرية دمرت مدينتين عندهم واحتلال امريكى كامل بعد كدة عندهم ومع ذلك قدرو يحولو قصتهم لاسطورة من النجاح فى كل شىء وكان طبعا من ضمنها النجاح المذهل فى عالم السيارات
وللحديث بقية باذن الله عن باقى الشعوب