إبليس والموظف..على قائمة الاكثر انتشارا في السوشيال ميديا عام 2017
حققت نكته عن إبليس والموظف ، إنتشارا واسعا على مواقع السوشيال ميديا ، لتصبح في مقدمة قائمة أكثر النكات إنتشارا في عام 2017 .. النكته تحمل نقدا لاذعا لحال بعض الموظفين ، وتقول ”
أبليس لقوة خارج من عند موظف مصرى بينهج ويكح وحاطط ايدة على قلبة وبيقول سلام قولا من رب رحيم !! .. قالولة مالك يا ابو الابالس ؟ قالهم .. الراجل دخل الصبح قعد على المكتب وقال بسم الله الرحمن الرحيم توكلت على الله وشغل قران على الكمبيوتر طلعت اجرى من المكتب ، شوية سمعتة بيضحك ويسب لصاحبة بالدين والقران شغال بقيت محتار ادخل علشان المسخرة اللى جوة والا افضل برة علشان القران اللى شغال !! ،، شوية وشفتة فاتح الدرج بياخد رشوة قولت لا دا انا ادخل بقى انشالة اولع حتى ! ، دخلت لقيتة ماسك الفلوس بيبوسها وبيقول الحمد لله اللهم ديمها نعمة واحفظها من الزوال !! لخبط أمى بصراحة خرجت جرى اتكعبل على وشى ،، شوية ولقيتة بيكلم واحدة فى التليفون وبيتفق معاها على الساعة خمسة هايعملوا حاجات قلة ادب دخلت جرى ما انا احب الحاجات دى موت بس فى اخر المكالمة لقيتة بيقولها لا اله الا الله وهى بترد علية وتقولة محمد رسول الله ، فى حفظ الله يا حبيبى !! جابولى جلطة وشلل رعاش ولاد المفترية .. وجريت بسرعة ،، شوية والظهر أذن وقام صاحبنا لبس الشبشب بتاعة من تحت المكتب واتوضى وصلى وانا زى المجنون وقولت خلاص بقى اليوم قفل .. خلص صلى من هنا ودخل لبس الشراب والجزمة ودخلت علية زميلتة سونيا الجامدة لقيتة بيبص على جسمها وعنية هاتتطلع على كل تفاصيلها والمشكلة إنة بيختم الصلاه وبيقول سبحان الله ، سبحان الله !! أنا كـ شيطان مابقتش عارف اعمل اية !! لدرجة إنى قولت اعوذ بالله من الشيطان وكنت هاحرق نفسى !! المهم إنة يشتغل ؟! أبداً .. إنة يخلص مصلحة لحد ! مستحيل ،، وفى أخر اليوم لقيتة بيقفل الكمبيوتر وبيعد الفلوس اللى فى الدرج و بيقول كفاية كدة بقى على قد فلوسهم واتصل بمراتة فى التليفون وقالها .. أبداً يا حبيبتى مفيش طول النهار مطحون فى الشغل .. ادينا بنرضى ربنا علشان يباركلنا فى الحلال .. من حق مش هاقدر أجى النهاردة على الغدا لان عندى إجتماع الساعة خمسة وهاروح اصلى العشاء جماعة لان فيه درس دينى مهم جداً يعنى نامى انتى يا حبيبتى … وخرج من مكتبة وعلى باب المصلحة شاف واحد فقير خرج من جيبة عشرة جنية وكرمشهم فى ايدة قوى وهو بيقول لنفسة لازم ايدى الشمال ماتعرفش ايدى اليمين فيها كام ، وعطاهم للغلبان وقالة ادعيلى يا حاج ربنا يسترها معايا !! ..بس يا سيدى وحسيت إنى بأموت وعندى كرشة نفس و بفكر اسوى معاشى وأطلع احج واقضى بقية عمرى فى العبادة .. والبركة فى العيال بقى”
المفاجأة أن الكثيرين رأوا هذه النكته تعبيرا صادقا عما يحدث في كثير من المصالح الحكومية
