الصحة والأسرة
التربية الخاطئة سبب فى الامراض النفسية
نهى الزينى
التربية هي أخطر وأهم مشروع في الحياة، وعلشان ننشئ مجتمع سوي ومستقر فلازم نربي ولادنا صح، وعلشان نربي ولادنا تربية صح فلازم نتعب ونبذل مجهود كبير جدا.
طبعا وللأسف كثير من الناس مبتعملش كده، كثير من الناس بتطلع عقدها أصلا في ولادها وبتربي جيل غير سوي وغير مستقر نفسيا بسبب ممارساتهم الخاطئة مع ولادهم.
والأب والأم اللي بيربوا ولادهم غلط، هم في الحقيقة بيربوا مشروع مريض نفسي، وبيخلقوا تربة خصبة للأمراض النفسية.
طيب ازاي الكلام دا، ازاي أنا كأب أو كأم بربي وبخلي ابني مريض نفسي؟!
أقول لحضراتكم ازاي من خلال الأمثلة؛
– لما بيزن أو بيعيط، فتقومي تضربيه، فبكده هيطلع مقهور وعنده جبن أو عنف تجاه المجتمع، وتلاقيه يا إما بيضرب زمايله ويضرب اخواته ويمشي يتخانق مع خلق الله ويخرب في كل حاجة في طريقه، يا إما يتضرب من أي حد وأي حد يعتدي عليه.
– لما يعوز حاجة فتلبيهاله بسرعة وتخلي رغباته وكل أوامره مطاعة ومجابة فيطلع شخص أناني ومعندوش استعداد حد يرفضله طلب.
– نفسه في حاجة فترفض وتفرض عليه قرارات إنت اللي عايزها بعكس رغباته، فيطلع شخص سلبي ميعرفش ياخد قرار لوحده وعايز دايما يبقا تابع وعمره ما يعرف يكون قائد.
– لما تعمليله وتعمليلها ما حاجة حتى كوباية المياه تجيبيهالهم لحد عندهم، غيطلعوا اتكاليين ميقدروش يشيلوا مسئولية نفسهم ولا مسئولية بيوتهم وأولادهم فيتطلقوا.
– لما يتخانق هو وأخوه على لعبة فتاخديها منه بالرغم من إنها لعبته وتديها لأخوه بحجة إنه كبير أو علشان تريحي دماغك، فيطلع شخص مقهور ومتعود إن أي حد يعتدي عليه أو ياكل حقه وهو ميعرفش يطالب بيه.
– تجيبيها من شعرها وتضربيها كل علقة والثانية وتقوليلها أخوكي الراجل انت تخدميه وهو يقعد مرتاح فتطلع كارهة الرجالة وكارهة المجتمع ورافضة تخدم حتى زوجها
– تعقدهم من المذاكرة ويكون كل همك انهم يتفوقوا دراسيا وبس وتمنعهم من أي ترفيه أو أي نشاط فيطلعوا كارهين الدراسة ورافضينها عندا فيك، وممكن كمان يبطلوا ذاكروا ويتعمدوا يفشلوا علشان يعاقبوك
– دايما تتهميهم بالتقصير وإنهم معملوش اللي عليهم حتى لو نقصوا درجات بسيطة، فيطلعوا مهزوزين وعندهم عدم ثقة في نفسهم وإحساس دايما بالتقصير وإنهم معكلوش اللي عليهم وممكن توصل بيهم لوسواس قهري.
– تكرهيها في أبوها وتقعدي توصفي صفاته السيئة بحق أو بباطل لحد ما تطلع كارها الرجالة وكارهة ترتبط بأي راجل.
– تخوفه من كل حاجة وتمنعه من أصحابه وتحطه جوه دايرة مغلقة مفيهاش غيرك امت وبس غيطلع شخص انطوائي مضطرب اجتماعيا ومعندوش مقدرة على التعامل مع بشر.
– تبقي كارهة أبوها ونغسك تطلقي منه وحملتي فيها غصب عنك فتبقي رافضة حملها وكارها وتيجي وانت رافضاها لأنها السبب في استمرارك معاه ومشاعر الرفض دي توصلها فتطلع حاسة بالرفض والكره تجاه نفسها وتجاه المجتمع الظالم اللي جت فيه وهي مالهاش ذنب ولا حول ليها ولا قوة في مشاكلك مع باباها فيحصل ليها اضطراب سلوكي تجاهك وتجاه باباها وتجاه كل اللي حواليها.
الحقيقة الأمثلة كثيرة جدا جدا جدا، والحقيقة إن تقريبا حوالي 90% من حالات الأمراض النفسية والسلوكية اللي بتعامل معاها في الأصل سببها راجع للتربية الغلط من الأهل.
اتقوا الله في أولادكم، ربوهم صح، واتعلموا يعني ايه تربية سليمة، علشان تطلعوا أولاد مستقرين نفسيا ومجتمع مستقر وسوي.
