– لا ده ولا ده , اللي حصل درس , درس قاسي لازم نتعلم منه .
.
هو ايه اللي حصل باختصار ؟
– اللي حصل اسمه سوء استخدام , abuse , زي اللي حصل في يناير 2011 , فجأه ناس لقت ماسورة الحريه انفجرت في وشها فاتحولت الثوره و الحريه من مفهوم جميل و رائع لسوء استخدام , و ظهرت معاها البلطجه و السبوبجيه , نفس الحكايه حصلت في مونديال روسيا , حدث ماكناش نسمع عنه قبل كده , أضواء و ميديا عالميه , و عيال مالقتش مدير للبعثه يديهم بالجزمه فاتهطلو و اتحول الموضوع من بعثة منتخب في كاس العالم لرحلة مدرسيه طالعه القناطر , ليه مالقوش مسئول للبعثه يعمل كونترول ؟ عشان المسئول نفسه اتهطل زيهم .
.
طب الحاجات دي و عدم الانضباط أثرت على ماتشاتنا في المونديال ؟
– أكيد , بس فيه حاجه اهم , طريقة لعب كوبر الدفاعيه العقيمه , و شخصيته الضعيفه جدا , و عدم اعداد اللاعيبه نفسيا , اي حد بيفهم كوره هيلاحظ في الماتشات اننا بنزل مغلوبين , مهزومين نفسيا , و النبي حتى لو بتلاعب فريق من العميان و المكسحين و انت بتلعب دفاع منطقه هيعمل عليك 30 هجمه و ييجي منهم جون و اتنين , ده مش مدرب و لا ينفع حتى بتاع بليله .
.
طب نعمل ايه بقى ؟
– لازم تحقيق مع اتحاد الكوره و اللاعيبه لما يرجعو , و لازم عقاب لانهم بيلعبو باسم 100 مليون , العقاب يكون بغرامات ماليه حد ادنى و بالمنع من تمثيل مصر لمدة محدده نقول سنه مثلا كحد اقصى , و لازم مدرب مصري وطني تكون شخصيته قويه و يعرف يسيطر على اللاعيبه و يعدهم نفسيا , زي حسام حسن و حسن شحاته , عندنا امم افريقيا بعد كام شهر و بعدها تصفيات كاس عالم .
.
هل لاعبي مصر اللي ماقدروش حجم المسئوليه خونه و مايستاهلوش يمثلو مصر ؟
– لا , مش خونه , انما مهاطيل , لو عايز تعرف اللاعب الخاين هقولك , في دول كتير فيها نجوم مابيحبوش يلعبو مع منتخب بلدهم في بطولات زي البطولات القاريه و بيتحججو بأي حجه , عشان بيخافو من الاصابه , و يكون ولائهم لناديهم بس وللملايين المتلتله , ده اللي نقدر نقول عليه خاين .
.
طب نقيم منتخب مصر ازاي ؟
– بص يا مولانا , المغرب رغم انها اتعادلت ماتش و اتهزمت ماتشين بس قدمت أداء يستحق الاحترام و زيها ايران , و طبعا نيجيريا و السنغال مشرفينا .
.
هل احنا أقل من الناس دي ؟
– لا خالص , ولا لاعبيتنا أقل من لاعيبتهم , منتخب ايران لاعيبته بيلعبو في الدوري الايراني اللي محدش يسمع عنه و في الدوري الروسي الضعيف جدا , والسنغال بيقودها لاعب اسمه ساديو ماني بيلعب مع صلاح في ليفربول انما لو حطيته جنب صلاح في النادي هيبقى مجرد قزم .
.
طب ايه المشكله بقى ؟
– مانا قلت لك , معسكر سئ مفهوش ضابط ولا رابط , و طريقة لعب بتخليك تنزل مهزوم , طريقه اتظلم بيها كل اللاعيبه حتى احمد فتحي و جبر و حجازي و عبد الشافي معذورين , و طبعا صلاح معذور جدا لانك بتلعب دفاع منطقه , العيب مش عيب لاعيبه ابدا .
.
أخر حاجه بقى عايز اقولها هي ايه ؟
– ابننا اللاعب المصري العظيم محمد صلاح بيعتذر للجماهير و بيقول انتظرونا في المونديال القادم!! أومال ايه حكاية يعتزل دي ؟ يابني انا مليش ذنب ان أي خروف بيركبك و يسرح بيك .
