نبيل عامر يكتب :” الحالة البالوظيه “

حاسس ان البلد دخلت فى الحالة البالوظية من ساعة قرارات رفع الدعم الاخيره
وفضيحة المونديال طربقت المزاج اكتر واكتر لأننا اسوأ فريق فنيا واداريا
طب ايه هى الحاله البالوظيه دى ؟
اقولك بمثال واضح جدا
الفيديو اللى انتشر اول امبارح انتشار النار فى الهشيم عن ان الناس فى الطياره منعوا المنتخب انه يقعد فى البيزنس كلاس لأنهم غضبانين وكده
سؤال بس
هو ما حدش ابدا شغل عقله وافتكر ان الفريق له طياره خاصه ما بيطلعش معاهم فيها جمهور ؟
طيب ايه اللى خلى الفيديو ده ينتشر .. الحاله العامه من الغضب من الفضيحه اللى حصلت
كم الاشاعات اللى طلعت على المنتخب بين النفى والاثبات خلال الاسبوعين اللى فاتوا , هل ده كم عادى ؟ طب مقبول ؟
يبقى لما نكون بنعانى من حاله نفسيه معينه . يتحول الكثير منا الى فاقدى اى احتكام للعقل ناقلى اشاعات يمكن استخدامهم للضرر العام بخدع ماتعديش على واحد اهبل , ولكن تفاجىء ان بيقع فيها ناس دكاتره
بالظبط زى الحاله العامه اللى متفشيه فى الناس كنتيجه مباشره لصعوبة العيش مع الغلاء الاخير , فعملك خدعة حقل نور اللى مخزونه 3 اضعاف حقل ظهر دى , هو لعب على الحاله النفسيه لأنك مضغوط وبتدور على اى بصيص من امل بفرج قريب ماحدش بيديهولك , فاداهولك باشاعه صدقتها , وهنا بقى المطبلاتيه كتبوا عليها مئات البوستات عن الرئيس اللى بيشتغل فى الخفاء ليعلن انباء ساره بعد العيد …..واتعرف انها اشاعه , ناس اصيبت باحباط , واللى طبلوا بان انهم لا يختلفوا عن حمير ناقلى الاشاعات فى شىء لأنهم برضوا ناقلى اشاعات
هى دى الحاله البالوظيه بالظبط …. ان تكون معد نفسيا تحت وقع ضغوط نفسيه مختلفه لكى تكون وقود يتم استخدامك للضرر بمن حولك بنشر اشاعات عباره عن هبل ابن عم عبط

واللى بيزود هذه الحاله البالوظيه هو تعامل الاعلام مع الملفات دى , فتلاقى مذيعه فى قناة بتلاته تعريفه بتجيب لك كل خبر غريب عن المنتخب وصور فنانين من معسكر جنيف مع اللعيبه وبتعرضها على انها فى روسيا وهاتك ياعجن وخبز هراء فى هراء , وتلاقى تعامل الاعلام مع ملف زيادات الاسعار الأخير , وكأنه فى حالة انفصام
ياترى شوفت البرامج الحواريه بعد الاجازه تعاملت مع القرارات الاخيره ازاى ؟ ولا ماخدتش بالك ؟ تقريبا كأن شيئا لم يكن , وطلع رئيس الوزرا الجديد قالك الشعب قابل بالزيادات , ونحن نراهن على ( وعى ) الشعب …. !!
موضوع الرهان على وعى الشعب ده باتحسس معاه مسدسى …
بص على الفيس وانت تعرف من كم الاشاعات التى تزكم الانوف وعى الشعب الحقيقى … هو فى شعب عنده وعى يتم استلطاخه لتسرح فيه كم الاشاعات دى ؟
لا ياراجل ……… بجد