نصائح منزلية لست البيت

نهى الزينى
بجيب داونى او اى معطر ملابس كيسه صغيره بحطها فى ازازه واملاها مايه وارش منها فى البيت طبعا الريحه ماقولكوش وكمان للناس اللى بتتعب من الروايح مش هتتعب من ااريحه دى وهتوفر معاكى بدل المعطرات الجو

بالنسبه لنظافه التواليت بجيب كيس كلوركس صغير او اريال جل او اى حاجه ابو 2جنيه ده وتخرميه بالابره وتحطيه فى السيفون وكل ماتشدى السبفون هيتملى رغاوى صابون وريحه حلوه ونظافه على طول
عشان تعملى احلى مكرونه بشاميل زودى كريمه لبانى وجبنه مثلثات على البشاميل هيبقى فظييييع ولما تطلع من الفرن غطيها على طول هتبقى طريه جدا منقماتقطعهاش الابعد لما تبرد خالص وادعيلى

كل لما تعصرى طماطم اوعى ترمى اللى ماتصفاش ده منها اللى بيتبقى فى المصفى شيليه فى كيس فى الفريزر وكل لما تتبلى الفراخ خدى من الكيس ده مش هتحتاجى تبشرى طماطم مخصوص عشان التتبيله

فرق معايا اوى كل لما اجى احط مايه بتغلى على النار الاقى الدهون اللى على السراميك بتدوب اعمليه بليفه وهتطلع بسهوله معاكى لا دعك ولا غيره

الحنفيات ادعكيها بفوطه عليه نقطه زيت جونسون هتلمع زى الجديده بالظبط وهتفضل كده مده هتنبهرى بمنظرهم بجد

دايما أحتفظى بزجاجة تنضيف الصحون الفاضية عشان تستخدميها بعد كدة فى أنك تخففى فيها السايل مرة تانية بالماء وبكدة هتوفرى طبعا .. وكمان ممكن تحتفظى بيها وتحطى فيها الكلور عشان ليها بوز صغير هيوفر عليكى بدل الدلق من الازازة

دايما حطى دواسة تحت الحوض بتاعك عشان المية او اى سوايل ممكن تقع منك

خلى دايما فى كيس جمبك وانتى بتطبخى تحطى فية بقايا تنضيف الفراخ او السمك او الخضار وطبعا ترمية أول بأول عشان انتى عارفة ريحتة ممكن تعمل اية …

باسكت الزبالة دايما خلية نضيف اغسلية دايما بمطهر ولبسية كيس ماترميش فية اى زبالة سايلة او اى حاجة تعمل روايح فية

دايما بعد ماتغسلى المواعيين والاطباق بالليل طهرى الحوض بشويةخل مع صابونك السايل

اغسلى الخلاط بتاعك اول باول كويس عشان لونة ميغيرش مع الوقت ويصعب عليكى بعد كدة تنضيفة

لو مطبخك سيراميك وبيوقع علية دهون او زيوت ومش نضيف ياعنى ودى طبعا حاجة بتضايقنا قوى كبى علية شوية ماية سخنة وخل وبريل وادعكية كويس الاول وبعد كدة امسحية هبقي فلة

لو عاوزة تحافظى على لمعان الاستالس بتاع البتوجاز بتاعك مافيش داعى انك تمسحية بالمنظفات القوية زى مذيب الدهون والحجات دى عشان بتطفى اللمعة بتاعتة خلى دايما ايدك فيها فوطة اول باول وامسحية ونضفية بعد كل طبخة كدة مش هيحتاج لااى منظفات غير البريل

وانتى بتنضفى التلاجة بتاعتك دايما امسحى الجوانات بتاع التلاجة بفرشه اسنان وياسلام لو جبتى البخاخة بتاع كى الهدوم دى وفيها شوية مية سخنة ورشيتي عليهم وانتى بتمسحى هيطرو معاكى وتبقى كويسة

بلاش المفارش اللى بتحطيها فى التلاجة على الارفف دى عشان بتمنع توزع البرودة بشكل كويس لباقى الارفف

دايما فضى اكياس العدس والمكرونة والحجات دى فى علب ونظمبها بشكل كويس فى المطبخ

الانبوبة دايما خلى بالك منها من تحت بيتخبها عشان الصراصير

المكان اللى تحت الحوض دة دايما نضفية ونشفية عشان مايعملش ريحة لانة مكان ممتاز للصراصير

التيربو بتاع البصل والتوم حطى فى اخر رف فية ورقة او قماشة عشان اى ورقة او فصوص توم ممكن تقع مابين الفتحات

لازم تهوى مطبخك يوميا وماتخليش اى زبالة بايتة فية او اى سوايل او اكل مكشوف عشان الحشرات

عودى نفسك تمسحى المطبخ كل يوم بعد ماتخلصى وبالفنيك

دايما حافظى على شكل ونضافة الرخامة خليها دايما فاضية ماتسبيش عليها غير الغلاية مثلا وحمالة التوابل والمجات والميكرويف الحجات اللى زى كدة

ماتخليش فوق التلاجة دة مكركب خلية دايما نضيف وفاضي

فضى مطبخك دايما من اى كركيب ياعنى لو اى حاجة مش بتستخدميها اديها لحد محتاج كوبايات . طشت زايد . حلل قديمة الحجات دى بتعمل كركبة وشكل مش حلو وممكن تتخبى فيها الحشرات ممكن تديها لاى حد محتاجها